بسكويت جوز الهند

اهلا بيكم يا قمرات

النهادة معايا ليكم طريقة تجنن للبسكويت

وهي بسكويت بجوز الهند

طعمه شبه البسكويت المعلب اللي هو Butter cookies فيه منه انواع كتير زي امريكانا

ودي صورة نهائية ليه قبل ما نقول الطريقة

نشوف سوا المقادير والطريقة

كوباية زبدة سايحة

وممكن تبقي جامدة بس مطلعاها من التلاجة عشان تبقي طريقة شوية

اما هي مش هتفرق معاكي في النتيجة النهائية ان كانت سايحة او طرية

من كوبايتين ونص ل 3 كوبايات دقيق حسب العجينة معاكي ونوع الدقيق

معلقة ونص بيكنج بودر

بيضتين

معلقة صغيرة فانيليا

كوباية سكر بودرة

كوباية ونص جوز هند

اول حاجة يا قمرات هنجيب السكر والزبدة ونحطهم في العجانة ونضربهم باداه الخفق

او ممكن نستخدم المضرب الكهربائي

بحيث ان السكر والزبدة يمتزجوا كويس

ودة هيكون شكل الخليط

لو مستخدمة زبدة طرية هيبقي اللون معاكي ابيض وكريمي كدة

المهم نكمل

بعد كدة نضيف البيض والفانيليا

ونكمل خفق

وبعد كدة نضيف الدقيق والبيكنج بودر وجوز الهند

ونستخدم اداة العجن ونعجن كويس جدا لحد ما كل المكونات تختلط ببعض كويس

او ممكن نكمل عجن بايدنا

هنلم العجينة بايدينا وهتكون طرية شوية

وعشان نعرف نشتغل كويس بالعجينة هنعملها علي شكل اسطوانة ونلفها بورق تغليف

ونشيلها في الفريزر لمدة نص ساعة

بعد كدة هنطلع العجينة بقت متماسكة اكتر

ونبتدي ناخد جزء منها عشان تبقي سهلة الفرد ونفردها

بالنشابة

والسمك ما يزيدش عن نص سنتيمتر تقريبا

نبتدي نقطع العجينة بقي بالاشكال اللي نحبها

انا استخدمت القلب وممكن اللي مش عندها قطاعات

تجيب فنجان قهوة وتعمل بيه وهيبقي بسكويت علي شكل دواير

او حتي تشكليها بايدك علي شكل كور وتفرديها

ونعمل اشكال علي العجينة كدة ونضغط كويس

عشان تبقي سهل علينا واحنا بنشيل الزيادات

وما تتبهدلش مننا الاشكال

وعملت بقطاعة تانية اللي هيا المشرشرة

وعملت شكل كمان اللي هو الوردة او النجمة بس مصورتش الخطوة دي

المهم نكمل تشكيل العجينة وكل ما يتبقي زيادات
نكمل يا قمرات

المهم يا قمرات هنرص البسكويت في صنية

واهم حاجة تعملي مسافات

بين كل بسكوتة والتانية لان حجمه هيزيد وقت الخبز

ومش لازم علي فكرة تفردي فيها ورق زبدة

واي نوع تيفال او ستانلس او الومنيوم مش هتفرق

كمان انا محبتش ادهن الوش بالبيض

اللي تحب براحتها طبعا وفي الحالة دي ممكن

تدهن الوش ببيض عليه فانيليا

وممكن كحاجة تزيينية

ترشي عليه سكر خشن شوية

هيبقي حلو جدا وشيك اوي

وندخل الصنية في فرن علي درجة حرارة متوسطة

لمدة ربع ساعة

واهم حاجة تتباعيه من وقت للتاني

لانه بيتخبز بسرعة جدا يمكن اقل من ربع ساعة

انا عملته في فرن كهرباء

وشغلت الفرن والشواية عشان التسوية تبقي متساوية

بمعني الوش والظهر يبقوا نفس التسوية واللون

كمان يا بنات حاجة مهمة اول ما لون البسكويت يتغير

ويبقي مايل للون الدهبي الفاتح اوي

طلعيه هتلاقيه طري هتقولي دة مش مخبوز كويس

ولسه متسواش وتسيبيه في الفرن

هقولك لا اوعي هيتحرق ويبقي ناشف جدا

هو بيبقي كدة اول ما يطلع من الفرن

سيبيه ربع ساعة هتلاقيه نشف وبقي تمام

ودي الاشكال اللي عملتها

الشكل المدور المشرشر

والقلب

والنجمة او الوردة

ودة الشكل النهائي للتقديم

ودي صورة كمان للبسكويت

بجد يا بنات طعمه رائع وخفيف اوي وشكله شيك جدا

وطبعا لو انت عاملة كمية كبيرة

يفضل تحفظيه في علبة محكمة الغلق

» بسكويت جوز الهند
» بسكويت دموع الشوكولا
» الشكولاتة الساخنة بجوز الهند المقادير:
» كيكة ييضاء بجوز الهند وشوكولاتة
» طريقة تحضير بسكويت الزنجبيل والقرفة